Á vorin um leið og ís fer af vötnunum, er byrjað að veiða í net í Laugarvatni og Apavatni. Silungurinn í þessum vötnum er vel rauður á holdið og mjög ljúffengur hvort sem er grillaður/steiktur eða matreiddur á annan hátt. Allur silungurinn úr vötnunum er flakaður og seldur ferskur.

Nýju flökin eru seld heima á bænum yfir sumartímann en líka í eftirtöldum verslunum: Verslunin Borg, Grímsnesi, Samkaup/Strax og Handverksgallerí, Laugarvatni.

| Aftur á aðalsíðu |

Uppskriftir með nýjum silungsflökum.

Nokkrar uppskriftir af grilluðum silungsflökum. Flökin mareneruð í þessum legi í 2-3 tíma:

2 msk. Tómatpurré
4 stk. Hvitlauksrif söxuð
1 msk. Hunang
1 ½ dl. Matarolía
salt og pipar
aromat

Öllu blandað saman og fiskurinn lagður í löginn (2-3 tímar). Tekinn úr leginum og grillaður annað hvort í fiskigrind eða beint á grillinu. Grillað í u.þ.b. 2-3 mín á hvorri hlið eða eftir stærð á flökunum.

Önnur uppskrift:

Útbúinn bakki úr álpappír og flökunum raðað á. Best er að hafa 2 flök í hverjum bakka eða það sem passar fyrir manninn. Betra er að smyrja álpappírinn með olíu svo að flökin festist ekki eins við. Flökin krydduð með salti og sítrónupipar. Síðan er hægt að setja alls konar grænmeti ofan á eins og t.d. blaðlauk, rauðlauk, sveppi, tómata eða bara það sem hverjum finnst best. Gott er að setja smá smjörklípu ofan á, en ekki nauðsynlegt. Grillið hitað vel, áður en fiskurinn er settur á. Grillað í u.þ.b. 5 mín. eða þangað til fiskurinn er soðinn. Þennan rétt er líka hægt að pakka alveg inn í álpappír.

Þriðja uppskrift:

Flökunum velt upp úr olíu. Krydduð með salti, pipar og söxuðum hvítlauk. Sett beint á vel heitt grillið, grillað í 2-3 mín. á hvorri hlið. (Fiskhliðin fyrst niður).

Steiktur silungur I.

Silungsflök u.þ.b. 600 gr.
250 gr. Sveppir
lítill gráðostur

Sítrónupipar stráð yfir flökin, látið bíða á meðan sveppirnir eru steiktir.
¾ hveiti, ¼ rúgmjöl og smá salt blandað saman og flökunum velt upp úr. Flökin síðan steikt í smjöri 2-3 mín. á hvorri hlið. Silungurinn tekinn af pönnunni. Gráðosturinn og smá matreiðslurjómi sett á pönnuna og hrært þangað til osturinn er bráðinn, sveppirnir settir saman við. Flökin borin fram með sítrónubátum og steinselju ásamt gráðostasósunni.

Steiktur silungur II .

Silungsflökunum velt upp úr rúgmjöli, kryddað með salti og pipar. Steikt í smjöri u.þ.b. 2-3 mín á hvorri hlið. Flökin tekin af pönnunni, tómatsósu hellt út í smjörið, hitað og smá steinselja eða graslaukur sett úr í. Notað sem sósa með fisknum.
Þessi réttur er oft mjög vinsæll hjá þeim yngri.

Meðlæti með fisknum er venjulega soðnar kartöflur og gott salat.

Hér er ein góð uppskrift af salati.

Tómatar
Mozorellaosur
Basilika
Smá edik og góð ólífuolía
Pipar.
 

Okkur finnst einnig alveg ómissandi að hafa gúrkusalat með steiktum eða grilluðum silungi.

Uppskrift: Gúrkan sneidd niður með ostaskera. Lögur búinn til úr köldu vatni, smá sykri og borðediki (smakkað til) og hellt yfir gúrkurnar. Látið bíða smá stund áður en borið fram.